Путинга янги СССР керакми?

Россия президентини Совет Иттифоқини тиклаш учун мафкураси ва имконияти йўқ. У ўзи ва атрофидагилар учун ҳокимиятни сақлаб қолишга ҳаракат қилмоқда, деб ҳисобламоқда Девид Саттер.

Россия президенти Владимир Путин СССРни тикламоқчи эмас, балки ўзи ва атрофидагилар учун ҳокимиятни сақлаб қолишга ҳаракат қилмоқда, деди Москвадаги Financial Times газетасининг собиқ мухбири Девид Саттер, Украинанинг “Апостроф” нашрига берган интервьюсида. Унинг фикрига кўра, Россия раҳбари ” ҳокимиятни кучайтириш учунгина халқаро турли хил авантюраларда қатнашмоқда”.

 “У ўзининг мафкураси йўқлиги ва Совет Иттифоқини тиклашнинг иложсиз эканлигини билади. Ҳақиқат эса бундан ҳам оддийроқ. Буларнинг барчаси Путиннинг ҳаракатлари ортида қандайдир ғоя бор деган қарашни яратиш учун”, – дея қўшимча қилди у.

Америкалик журналист Россияда ҳокимиятни махсус хизмат вакиллари эгаллаб олди деган фикрга қўшилмайди.

“КГБдан чиққан одамлар ҳақиқатан ҳам ҳозир ҳокимият тепасида. Аммо мен бу вазиятда махсус хизматлар ҳокимиятни забт этган деб ўйламайман. Менимча, бу коррупциялашган гуруҳ бўлиб, унинг таркибида махсус хизматнинг кўплаб ходимлари бор. Ҳозирги ҳукуматни шакллантирганлар учун махсус хизматларга алоқадорлик муҳим кўрсаткич бўлган, лекин ягона эмас. Бу дунёни забт этишга интилаётган сирли, қудратли ташкилот эмас. Ельцин (собиқ президент) атрофидаги вакиллардан тузилган ва провокациялар орқали коррупциявий гуруҳ ҳокимиятни қўлга киритди – бу ишни махсус хизматларнинг ёрдамисиз амалга оширишнинг иложи йўқ эди”, – дея изоҳлади Суттер.

Унга сўзларига кўра, посткоммунистик Россия учун уруш ички сиёсатнинг муҳим воситасига айланди: “Иккинчи Чечен уруши Путиннинг ҳокимиятга келишини таъминлаш учун керак эди. Охир-оқибат ҳокимиятни ўзгартирган Украинага қарши уруш эса рус аҳолиси эътиборини Майдан қўзғолони дарсларидан чалғитиши керак эди.

Украинадаги вазият тўхтаб қолгач, улар ўзлари учун унчалик керак бўлмаган Сурияда уруш бошладилар. Шундай қилиб, биз ҳар қандай ҳолатда ҳам, уруш аҳолини мамлакатдаги қонунбузарликларга аҳамият бермаслиги учун ташкил қилинган лойиҳа эканлигини кўрмоқдамиз. Бу такрорланувчи тенденция ва келажакда бу ҳолатлар яна такрорланади деб ўйлайман.”