Олий Мажлис Қонунчилик палатаси депутати ейди Дониёр Ғаниев Россия ташқи ишлар вазири расмий вакили Мария Захарованинг ўзбек тили бўйича баҳсларга сабаб бўлган баёнотига муносабат билдирди.
Депутат Захарованинг баёнотини Ўзбекистон ички ишига “бурун суқиш”, деб таъриф берди, va давлат идораларида ўзбек тилини кенгроқ жорий қилиш учун янада кўпроқ чоралар қўллашга чақирди.
“Замонавий дипломатия қоидаларига кўра, бир суверен давлатнинг мансабдор шахслари ёки расмий вакиллари бошқа бир суверен давлатнинг ички сиёсий-ижтимоий ишларида иштирок этиши ҳамда ОАВларда бундай масалалар юзасидан муносабат билдиришига рухсат берилмайди. Лекин бу давлатнинг Украинанинг суверен чегараларини ҳам ҳурмат қилмаганини эсласак, унинг расмий вакили томонидан дипломатиянинг оддий этика қоидаларига амал қилинмаслигига ажабланмаса ҳам бўлади”, дейди Дониёр Ғаниев.
Олий Мажлис қонунчилик палатаси депутати ўзбек тили тўғрисидаги qonun муҳокамасига Россия расмийсининг аралашганидан қайсидир маънода хурсандлигини билдирган.
“Бошқа томондан, “Давлат тили тўғрисида”ги Қонуннинг янги таҳрири лойиҳаси муҳокамасига Россия ташқи ишлар вазирлиги вакили Захаровани аралашиб, “бурун суққанидан” қайсидур маънода хурсандман. Чунки, биринчидан бугунги кунгача тил масаласи кўпчилик томонидан ижтимоий муаммо сифатида кўриб келинаётган бўлса, Захаровани бу мавзуга аралашиши ортидан эса давлат тили сиёсий масала сифатида кун тартибига чиқди. Давлат тили давлат суверенитети рамзларидан бири эканлиги, унинг мақоми, обрўси va амалиётда қўлланиши муҳим эканлигини кўпчилик тушуниб етмоқда”, дейди Дониёр Ғаниев.
Депутатнинг таъкидлашича, шундан келиб чиқиб, парламент ҳам, ҳукумат ҳам ўз сиёсий иродасини “Давлат тили тўғрисида”ги qonun лойиҳасини тезлик билан қабул қилиб, унинг ижроси устидан қатъий назорат ўрнатиш билан намоён этиши керак.