Ўзбекистон Россиясиз ҳам савдо қила олади

Ўзбекистон Россияни четлаб ўтиб, Европага биринчи юк поездини жўнатди.

16 декабрь куни Ўзбекистондан Европага Ўрта йўлак (Транскаспий халқаро транспорт йўналиши) бўйлаб биринчи контейнер поезди жўнаб кетди, деб хабар бермоқда “Ўзтемирйўлконтейнер” матбуот хизмати.

Юк поезди мис концентрати ортилган 46 вагон ва 91 дона 20 футлик контейнердан иборат. Контейнер поезди узунлиги 4000 км дан ортиқ бўлган “Ўзбекистон – Туркманистон – Озарбайжон – Грузия – Болгария/Европа” йўналиши бўйлаб ҳаракатланади.

“Ўрта йўлак” деб номланувчи йўналиш Туркманистон, Озарбайжон ва Грузия, шунингдек, темир йўл паромлари орқали Каспий ва Қора денгизларни кесиб ўтади, дея қайд этмоқда Reuters.

Таъкидлаш лозим, Брюссел Ўрта йўлакни Россия орқали ўтувчи анъанавий Шимолий Европа-Осиё темир йўл йўлига муқобил сифатида илгари сурмоқда.

Нашрнинг қўшимча қилишича, Европа тикланиш ва тараққиёт банки (ЙТТБ) ноябрь ойида Россияни четлаб ўтиб, Европа ва Осиё ўртасидаги юк ташиш йўналишларини ривожлантиришга миллиардлаб евро сармоя киритишга тайёрлигини билдирган.