Барака топгурлар, ўзи сал қия очилган автомашина импортини шу тартибда чекламоқчи бўлаётган экансизлар ёки импорт автомашина олди-сотдиси учун ишлаб чиқарувчиларнинг расмий дилерлик талабларини тикламоқчи экансизлар, амалдаги қонунга ва талабларга риоя қилинглар. Ёки очиқ-ошкора эълон қилингизлар, Ўзбекистон буёғига ҳуқуқий давлат эмас, деб. Ғинг деган номард. Ўзларингиз чиқарган қонун-қоидаларингизга ўзларингиз ҳам амал қилинглар.
“Тадбиркорлик фаолияти эркинлигининг кафолатлари тўғрисида”ги Қонунга кўра, Тадбиркорлик фаолиятини амалга ошириш тартиб-таомилининг мураккаблаштирилишини ва тадбиркорлик фаолияти субъектлари зиммасига янги мажбуриятлар юклатилишини назарда тутадиган… янги чораларни белгилайдиган қонунчилик ҳужжатлари расмий эълон қилинган кундан эътиборан камида уч ойдан кейин кучга кириши белгиланган. Яъни, айтайлик, кеча монополист лоббичилар фойдасига қарор чиқариб берганингизда ҳам бу қарор 28 июндан кучга киради, 1 апрелдан эмас. Бу қонун, уни айланиб ўтиб бўлмайди.
Иккинчидан, хўжалик юритувчи субъектларга янги чекловлар ва янги турдаги рухсат бериш тартиб-таомиллари, хўжалик юритувчи субъектларнинг белгиланган ҳуқуқларини қисқартириш (камайтириш) ёки уларга қўшимча мажбуриятлар ёхуд қўшимча харажатлар жорий қилиш Адлия вазирлиги томонидан баҳоланиши керак. Бу Президент қарори.
Учинчидан, тадбиркорлик фаолиятини тартибга солувчи норматив-ҳуқуқий ҳужжатлар лойиҳаларини Адлия вазирлигида ҳуқуқий экспертизадан ўтказишдан олдин Президент ҳузуридаги Жамоатчилик кенгаши муҳокамасидан ўтказилиши керак. Буям Президент қарори.
Тўртинчидан, меъёрий ҳужжат ёки унинг лойиҳаси маҳсулот ишлаб чиқарувчи ёки хизматлар кўрсатувчи хўжалик юритувчи субъектлар доираси ва сонини чеклаш … етказиб берувчиларнинг бир-бири билан рақобатлашиш имкониятини чеклаш …етказиб берувчиларнинг бозор муносабатларида бир-бири билан рақобатлашиш истагини камайтирса … рақобат учун салбий деб топилиши керак. Бу Ҳукуматнинг қарори.
Шундай экан, ҳеч қурса Ўзларингиз чиқарган қонун-қоидаларингизга Ўзларингиз амал қилинглар.
Агар нормал давлатлардаги каби нормал суд бўлганида бу каби монополистлар фойдасига нотариф манипуляциялар аллақачон бекор қилинган бўларди.
Худди шу каби манипуляция Маиший техника импорти масаласида амалга оширилганига ҳали 3 ой бўлгани йўқ. Легитимлиги савол остида бўлганига қарамай, юмалоқ ёстиқ бўлиб ўтиб кетганига энди бу қадам қўйилмоқда.
P.S. Айтишларича, автомашиналар импортини янада такомиллаштириш “ташаббуси” Техник тартибга солиш Агентлигидан чиққан экан.
Отабек Бакиров