Қозоғистон нашри Роскомнадзор талабини бажаришдан бош тортди

Россиянинг Алоқа ва оммавий коммуникациялар устидан назорат хизмати (Роскомнадзор) Қозоғистоннинг “Власт” нашридан Россиянинг Украинага бостириб кириши ҳақидаги хабарларни олиб ташлашни талаб қилиб, сайтни Россияда тўсиб қўйиш билан таҳдид қилди. “Власт” муҳаррирлари “рус томони талабларини бажариш ниятимиз йўқ” деб жавоб берди.

Журналистларнинг таъкидлашича, Роскомнадзор Украинанинг Винница шаҳрида 20 дан ортиқ одамнинг ҳаётига зомин бўлган Россия ракеталари томонидан ўққа тутилиши ҳақидаги хабарни, шунингдек, Украинанинг Мариупол шаҳрида тинч аҳоли ҳалок бўлгани ҳақидаги хабарларни олиб ташлашни талаб қилган.

Рад этилган тақдирда, Россия томони “Власт” нашри сайтини Россия ҳудудида тақиқланган маълумотларни тарқатувчи ресурсларнинг ягона реэстрига киритиш билан таҳдид қилди.

Журналистлар “Власт – Қозоғистон нашри, унинг фаолияти Россия қонунлари ва назорат органлари томонидан тартибга солинмайди. Таҳририят Украинадаги уруш ҳақидаги бу ёки бошқа янгиликларни олиб ташлаш ниятида эмас ва ҳарбий цензура учун масъул бўлган Россия департаменти бу борада қандай фикрда бўлишидан қатъи назар, уни ёритишда давом этади “, деб жавоб беришган.

Роскомнадзор россиялик журналистларга “махсус ҳарбий операция” атамасини ишлатиб, Украинадаги урушни “уруш” деб аташни тақиқлайди. Тақиқни бузгани учун регулятор аллақачон Россиянинг мустақил нашрлари, жумладан “Медиазона”, “Эхо Москвы”, “Дождь”, “ББС Рус хизмати”, “Озодлик радиоси” ва “Медуза” каби ўнлаб веб-сайтларни блоклаган.

Россия оммавий ахборот воситаларидан ташқари, Роскомнадзор бошқа давлатлар журналистларини ҳам назорат қилмоқчи. Масалан, апрель ойида регулятор Қирғиз ОАВси ҳисобланган “Клооп” ни огоҳлантиришсиз блоклаб қўйган. Бундан ташқари, Қозоғистоннинг “NewTimes.kz”, “Ratel.kz” ва “Exclusive.kz” нашрлари Украинадаги уруш ҳақидаги нашрларни олиб ташлаш талабини олгани маълум қилинган.